[东方报]歐冠：歐聯8強劇力萬鈞[04-07]

显示全部楼层 · 7 天前

歐聯爭霸進入戲肉，8強賽事激戰連場。重頭戲皇家馬德里鬥拜仁慕尼黑、巴黎聖日耳門撼利物浦，4支歐洲霸主正面交鋒劇力萬鈞！阿仙奴同馬德里體育會要力爭首度封王，亦要先過士砵亭同巴塞隆拿嘅難關，場場波都話題十足，球迷真係有眼福！

強強交鋒唔敢亂攻皇馬拜仁半場講和
今晚歐聯8強首回合大戰，皇家馬德里主場硬撼拜仁慕尼黑。「銀河艦隊」雖然今非昔比，但上圈意外大炒曼城，證明佢哋踢歐聯特醒，拜仁就算近期贏到開巷都好，今仗都唔敢輕敵，加上近年歐聯交手勁旺半場和，不妨再追多鋪。（Now 643周三凌晨3時直播）

皇馬今季動盪不安，無論係前任主帥沙比阿朗素，抑或現任主帥艾比路亞領軍，戰績都未如理想，唔單止失落西超盃同西盃，聯賽又畀死敵巴塞隆拿甩開到7分。正當面臨四大皆空之際，「銀河艦隊」喺歐聯16強備受睇淡之下，中場費達歷高華維迪突然發威，兩回合大炒曼城五個一皮，令人喜出望外，可見呢支15屆盟主絕非浪得虛名，不過今場鋼門泰拔高圖爾斯繼續因傷倦勤，防線存隱憂唔敢冒進。

卡尼復出狀態未十足
另邊廂，拜仁贏波停不了，各項賽事近11仗獲10勝1和，射手哈利卡尼因為受傷，日前聯賽刻意避戰，雖然有指佢嘅傷勢並唔嚴重，今仗好大機會復出，但狀態未必夠十足，進攻難免會受到一定影響。翻查紀錄，原來拜仁自從2012年4強後，4次喺淘汰賽面對「銀河艦隊」都未嘗晉級滋味，今場一定會小心翼翼；何況兩軍近5次歐聯碰頭，有4次開半場和，畢竟今仗只係首回合，必定先求穩陣，半場和值得再追。