[东方报]英超：久疏戰陣要時間撻着副偈 紅魔慢熱半和[04-13]

今輪英超爆發「玫瑰打吡」，曼聯主場迎戰列斯聯。「紅魔鬼」賽程「清閒」，已經休戰3星期，球員狀態成疑，開波初段要時間重拾比賽節奏，加上球隊表現向來慢熱，近6場有5次半場打和，今仗未必佔到甜頭；列斯聯遇上傳統宿敵，肯定額外搏命，有力拉成均勢，一於博半場和。（Now 621及611周二凌晨3時直播）

曼聯今季冇得踢歐洲賽，本土兩項盃賽亦一早出晒局，加上早前國際賽檔期，所以自從3月21日打和般尼茅夫後，至今一直未有比賽，近日就拉隊去愛爾蘭集訓保持狀態。雖然球員「叉足電」，但始終休息太耐，反而可能打窒道氣，要重新搵番比賽感覺。此外兩大箭頭麥比奧莫及班捷文施斯高同樣有輕傷在身，就算可以披甲，亦難免會影響發揮。

曼聯由卡域克接手執教後，即使整體成績有明顯改善，但「蜜月期」逐漸消退，近3場聯賽僅得1勝，近6場更加只有1次上半場入到波，要迅速攻破列斯聯大門非易事，今場仲有中堅哈利馬古尼停賽，防線存有隱憂下，預計卡域克會採用較穩陣戰術，避免早段失波，更易陷入膠着。

列斯聯士氣盛頂得兩嘴
另邊廂，列斯聯人腳質素無疑稍遜，但勝在夠硬淨，即使近6場英超未贏過，但當中有4次打和，對手包括車路士及阿士東維拉，對曼城亦僅負0比1。佢哋上場英足盃8強同韋斯咸踢足120分鐘，仍然不分勝負，最終更憑互射12碼殺入4強，士氣相當高昂，可望憑頑強鬥志頂住先，可惜中場主將安東史達治上仗受傷，佢今季聯賽入4球及3次助攻，若果佢真係缺陣，球隊要入波更難，寧願進一步屯重兵防守博攞1分。

88888888888888888888888